Na lashkare na sipahe na kasratunnase

Na lashkare na sipahe na kasratunnase
Na Qasime na Ali Akbare na Abbase
Bawaqte asr ye poocha kisi ne maula se
Wo kya hue jo na bar aazma the aada se

Ek aah nikli ye sunkar dile shikasta se
Kahaa ke haye wo sab qatl ho gaye pyaase
Na lashkare na sipahe na kasratunnase
Na Qasime na Ali Akbare na Abbase

Nahi hai koi ab apna Hussain akela hai
Rasoole haq ka nawasa Hussain akela hai
Jaha me dilbare Zehra Hussain akela hai
Najaf se aayiye baba Hussain akela hai

Na lashkare na sipahe na kasratunnase
Na Qasime na Ali Akbare na Abbase
Raha na koi bhi Maula ka muniso yawar
Shaheed ho gaye Maula pe Muslimo Jafar

Habeeb Ibne Mazahir na Ausja ka pisar
Na ab Hussain ke ashab hai na lakhte jigar
Na lashkare na sipahe na kasratunnase
Na Qasime na Ali Akbare na Abbase

Qareeb Shah ke Zainab khadi hai khakbasar
Gala jo bhai ka chooma to ro diye Sarwar
Diya Hussain ne bosaa bahan ke bazoo per
Bahan ne bhai ko rukhsat kiya hai ye kah ker

Na lashkare na sipahe na kasratunnase
Na Qasime na Ali Akbare na Abbase
Ghazab ka farq numaya hai aaj aur kal me
Chupa hai Fatima Zahra ka chand badal me

Ghiri hai Aale Nabi Karbala ke jungle me
Ali ka laal hai zakhmo se choor maqtal me
Na lashkare na sipahe na kasratunnase
Na Qasime na Ali Akbare na Abbase

Ye waqt wo hai ke Sughra ka namawar pahucha
Utha ke haath Madine ke simt Shah ne kaha
Safar tamaam hua alwida hai aye Sughra
Bataaoo kya tujhe tere musafiro ka pata

Na lashkare na sipahe na kasratunnase
Na Qasime na Ali Akbare na Abbase
Sitam hai Karbobala hai Nabi ki itrat hai
Naseebe Aale Abaa bekasi hai ghurbat hai

Siyah aandhiya udti hai kya qayamat hai
Aur bus Hussain hai aur manzile shahadat hai
Na lashkare na sipahe na kasratunnase
Na Qasime na Ali Akbare na Abbase